LAAT WAAI:

1. Verhit die olie in jou potjie en braai die uie tot sag. Voeg dan die maalvleis en knoffel by, geur met sout en peper, en braai tot die vleis bruin en geurig is. Gebruik jou houtlepel om enige stukke vleis wat aanmekaar vassit, los te breek.
2. Voeg die kerriepoeier, tamatiepasta en appelkooskonfyt by en meng alles goed saam en braai vir nog so 10 minute tot al die geure goed saam gemeng het, haal die potjie van die vuur af. Indien jy dit bietjie te lank gebraai het, of jou hitte te veel was, en dinge lyk droog, voeg n spatsel water, wyn of bier by.
3. Bou die braaibroodjies: Smeer botter aan een kant van elke sny brood (hierdie kante gaan aan die buitekant van die braaibroodjie wees) Pak helfte van die broodjies neer, dat die botterkant na onder wys. Bedek elke sny brood met kerriemaalvleis, en strooi mildelik kaas bo oor. Maak die broodjies toe, met die ander sny brood en laat die botterkant na bo wys.
4. Braaibroodjies is draaibroodjies. Braaibroodjies moet gereeld gedraai word, en die beste is om dit te braai in ‘n toeklaprooster. As jy nie ‘n toeklaprooster het nie, gaan koop een. Jy benodig medium kole en hitte, en plaas jou rooster redelik hoog. Jou doelwit hier is vir die kaas om gesmelt te wees en die vleis deurwarm teen die tyd wat die brood bruin en bros gerooster is. Maak die rooster liggies oop, terwyl jy braai, net om seker te maak die brood sit nie vas aan die rooster nie. Jy sal vind, met hierdie spesifieke broodjie, van die sappe van die vleis trek deur die brood, en gee dit so bietjie ekstra kleur, geur en brosheid aan die broodjie.
5. Sodra die broodjies reg is, haal hulle van die rooster af, sny in die helfte en eet die broodjies so gou as moontlik.