Bruinbroodcrostini met gillende olywe
28 Desember
24 crostini
Vegetaries
4
Met oop mondjies, bloedrooi tongetjies en uitgestrekte armpies voltooi hierdie olywe ’n opera, kondig ’n fees aan en herinner jou dat jy skreeu-honger is.
Bestanddele
8 snye bruinbrood
5 e pekanneut-olie
300 g ricotta
2 e dik room
12 swart ontpitte olywe, gekap
100 g ingelegde artisjokharte, gedreineer en gekap
2 opgehoopte e italiaanse pietersielie, gekap
2 opgehoopte e grasuie, gekap
fyngerasperde skil van 1 lemmetjie
6 groen olywe, gevul met rooi soetrissie
pienksout met knoffelvlokkes
grofgemaalde swartpeper
ekstra grasuie
Metode
Gebruik ’n glas waarvan die bokant ’n 5 cm deursnee het, sny 24 sirkels brood. (Droog res van die brood en maal tot krummels vir latere gebruik, ons gooi niks weg nie).
Verf sirkels aan beide kante met olie.
Braai 12 op ’n slag in warm pan tot goudbruin aan albei kante.
Hou eenkant (kan vir ’n dag of twee in lugdigte houer gebêre word).
Meng ricotta en room saam in mengbak.
Meng swart olywe, artisjokke, pietersielie, grasuie en skil by.
Geur met sout en peper (proe en pas geur aan indien nodig!)
Net voor opdiening: Skep teelepels vol op gebraaide sirkels.
Sny groen olywe in kwarte.
Plaas een skyfie bo-op elke happie.
Sny ’n paar grasuie in 2,5 cm lengtes.
Druk 2 uitgestrekte armpies in ricotta direk langs elke gillende olyf.