Bestanddele
Vir die 1 laagkoek:
375 ml Suiker
125 ml Botter
15 ml Warm water
2 Eiers
125 ml Kakao
125 ml Warm water
500 ml Koekmeel
5 ml Koeksoda
2,5 ml Kremetart
Knippie sout
125 ml Karring- of suurmelk
10 ml Vanieljegeursel
Vir die Ganache:
125 g Donker-sjokolade in blokkies gebreek
10 ml Botter
60 ml Room
Vir die sjokolade-versiersel:
500 ml Versiersuiker
45 ml Kakao
100 g Botter
3 ml Vanieljegeursel
30 ml Warm water
Metode
Voorverhit die oond tot 180 °C. Smeer 2 x 20 cm-koekpanne en voer dit met gesmeerde bakpapier uit.
Verroom die suiker, botter en 15 ml warm water saam. Klits die eiers een vir een by en klits goed na elke byvoeging. Meng die kakao en 125 ml warm water, en klits dit by die suiker mengsel.
Sif die meel, koeksoda en kremetart in ’n aparte bak saam. Meng die karringmelk en geursel. Voeg die meelmengsel en die karringmelk-mengsel alternatiewelik by die suiker mengsel. Klits tot net gemeng.
Gooi die beslag in die voorbereide panne en bak 25–30 minute tot ’n toetspen skoon uitkom. Laat 10 minute in die panne staan en keer op ’n draadrak uit.
Laat heeltemal afkoel. Plaas die versiersel tussen die twee koeklae. Rond af met die ganache bo-oor die koek. Versier met vars bessies, indien verkies.
Sjokolade versiersel
Sif die versiersuiker en kakao saam. Klop die botter by en verroom tot sag. Voeg die geursel en genoeg warm water by om ’n gladde versiersel te maak.
Ryk ganache
Sit die sjokolade in ’n kastrolletjie, voeg die botter by en verhit dit stadig terwyl jy roer tot die sjokolade gesmelt is. Haal van die hitte af, voeg die room by en meng goed. Verkoel tot dit styf genoeg is.