Donker sjokolade koffielog
14 November
4
Hierdie resep sal werk in enige 26 x 8 x 4.5cm pannetjie of in ‘n 20 x 10 x 7cm broodpannetjie
Bestanddele
250 g Scotts vingerbeskuitjies
360 g Donker sjokolade
80 g Ongesoute botter
1/3 koppie Kakao
1 blik Kondensmelk
20 ml Espresso
10 g Gemaalde koffie
40 g Ekstra donker sjokolade
Lekkers vir versiering bv. Smarties
Ekstra kakao om oor te sif
Metode
- Smeer die pannetjie en voer met bakpapier uit.
- Breek die sjokolade en sit dit in ‘n kastrol en smelt oor ‘n lae hitte
- Voeg die botter, kondensmelk en kakao by en meng goed.
- Voeg dan die espresso en gemaalde koffie by en meng weer goed. Sodra alles gesmelt en gemeng is, sit jy die hitte af.
- Breek die beskuitjie grof en voeg dit by jou sjokolade koffie mengsel. (Jy kan dit in ‘n plastieksakkie plaas en slaan met ‘n rolstok.)
- Skep in die pannetjie en druk goed in en maak gelyk bo-op.
- Pak dan ‘n laag koekies wat nou ‘n bolaag vorm in die pannetjie, maar eintlik die kors gaan wees wanneer jy hom omkeer.
- Sit in yskas vir ten minste 4 ure tot goed gestol.
- Haal uit en sit op ‘n opdien bord.
- Sit die ekstra sjokolade in ‘n mikrogolf bakkie en smelt 50%. Gebruik die gesmelte sjokolade en lekkers om die log te versier.