Hier

Joseph Mabena woon saam met sy vrou, Doreen, hulle kinders en eggenote, en hulle kleinkinders in ’n oorvol huis in Hangberg. Wanneer hy by sy werkplek beseer word, ontvang Mabena ’n groot kompensasie-uitbetaling vir die verlies van sy een oog. Sy familie is skielik oordrewe besorg oor hom en bely hulle liefde in die hoop om ook van dié geld te kry. Mabena sien deur hulle vals toegeneentheid en besluit om nie ’n sent van sy “swaar verdiende” geld te deel nie. By die plaaslike kroeg ontmoet hy ’n nuwe liefde, Zelda, en hy bring haar tot afgryse van sy vrou en kinders huis toe. Wanneer hy aankondig dat hy met haar wil trou, besluit sy vrou en kinders om hom te vergiftig.

Pieter, ’n konserwatiewe pa en wewenaar, lei ’n eensame lewe. Op wat sy vrou, Cecilia, se verjaardag sou wees, spook helder herinneringe aan gelukkiger dae saam met haar en hul kind by hom. Nadat Cecilia oorlede is, het hy vervreem van hul seun, Juan, geraak wat aan geslagsdisforie gely het. Hy kon nie Juan se transisie na Charlize aanvaar nie. Pieter besoek die begraafplaas in rou oor hierdie verliese en tref Charlize aan wat op hom wag. Hier waag hy die eerste onseker treë na versoening en ’n poging om die skade wat hy aangerig het, te herstel.

Martha is 'n enkellopende kelnerin wat nie weet wat sy met haar lewe wil doen nie. Boonop word sy vandag 28 en almal weet 28 is die nuwe 30 en 30 is die begin van die einde vir enige vrou met planne om te trou of ma te word. Sy word die oggend ná haar verjaarsdagpartytjie wakker met 'n onbekende man in haar bed en 'n vreemde gevoel in haar maag. 'n Apteektoets bevestig haar vermoede – sy is swanger.

’n Bendegeteisterde gemeenskap op die Kaapse Vlaktes word met ’n ystervuis deur die gevreesde Muay Thai-skopbokser The Kingpin regeer. Clifford Smit is ’n gedissiplineerde afrigter van tradisionele Oosterse gevegskuns en hy probeer om jongmense uit die kloue van bendes te bevry. Clifford se lewe stort in duie wanneer sy vrou brutaal vermoor word omdat hy die Kingpin se seun gewerf het. Toe Clifford langs sy vrou se liggaam staan, word hy oorweldig deur ’n drang na vergelding. Hy voel verskeurd tussen die Oosterse geloof in die draak as simbool van goedheid en geluk, en die Westerse idee van die draak as ’n ondier wat dood en verwoesting saai. Hy kies om sy erekode te breek en sweer wraak.