Logo
kykNET_Magda_Louw_Seisoen_2_SP_BB
web uni tv guide

Magda Louw

144KomediePG13 L

seisoen

2

1

kykNET_Magda_Louw_Seisoen_2_Poster_Cast

Volg die lewe van Magda Louw en haar man, Erhard in die tweede seisoen van die treffer-komedie Magda Louw, waarmee jy jouself kan vereenselwig met temas soos oudword, tyd wat verbyjaag, leë nes-sindroom, die huwelik en die dood. 

S2 | E10
04 Maart 20:00
'S2/E10'. Erhard se broer, Ferdinand, kom maak 'n draai. Die kuiertjie is lekker totdat Erhard begin snuf in die neus kr...

kykNET se trefferkomedie "Magda Louw" terug in Januarie

News
10 November 2023
Die tweede seisoen van "Magda Louw" word van Maandag 1 Januarie 2024 om 20:00 op kykNET uitgesaai.
Magda Louw Article Image S2

2024 gaan op ’n hoë noot vir kykNET-kykers begin, wanneer die tweede seisoen van die gewilde Magda Louw-komediereeks, met die nimlike Desiré Gardner in die titelrol, op Nuwejaarsdag afskop.

“Die gevoel van die reeks gaan dieselfde bly: Lag met ’n traan . . .” beloof Desiré. Sy sê sy hoop mense hou van Magda omdat hulle met haar kan vereenselwig. Dalk ken iemand ’n Magda soos haar karakter, of dalk is iemand sélf opgesaal met Magda Louw se lewe.

“Die meeste van die temas, wat met ’n tong in die kies – en ’n knop in die keel aangeraak word – is temas waarmee ons onsself kan vereenselwig en verstaan. Dinge soos oudword, tyd wat verbyjaag, leë nes-sindroom, die huwelik en die dood,” sê sy.

Volgens Desiré gaan kykers die tweede seisoen Magda se gesin beter leer ken. 

’n Hele paar misverstande duik op – en die groot vraag is natuurlik met hoeveel drama Magda daarop gaan reageer.

Die groot tameletjie, wat Magda en haar man, Erhard (Hannes van Wyk), in die tweede seisoen moet trotseer, is iets wat sy nooit in haar lewe wou doen nie. Sy noem dit haar “Job Hoofstuk 30 . . .” Hulle is genoodsaak om bakhand voor haar seun, Baltus (Bennie Fourie) te staan vir verblyf – “voor die een wat sy gebaar het” – en sy tuin woonstel is hul voorland.

“Ek dink die grootste boodskap van Magda Louw, veral in dié seisoen, is dat die lewe so onvoorspelbaar is dat jy nooit weet wat môre gaan gebeur of wat oor jou pad gaan kom nie,” sê Desiré.

Daarom is dit belangrik om te besef dat baie meer mense, ook diegene met hul perfekte maskers, dalk deur dieselfde vrese in die gesig gestaar word en ook sukkel met onsekerhede en lief en leed – nes enige ander mens.

“Ons is eenders in ons andersheid en dit is een van die mees gerusstellende waarhede van die lewe.”

“Maak nie saak wat jy doen nie, hoe mooi jy oudword, hoe gesond jy leef of hoe baie ons van mekaar verskil nie, die een ding is seker: Ons almal word oud. En ons is almal net tydelik hier, terwyl ons almal sukkel om elke oomblik te waardeer en werklik te ervaar.”

Meer oor Desiré Gardner & Magda Louw

  • Kykers het Desiré leer ken in die sepies Suidooster (Carmen Fourie) en Binnelanders (Daleen Jonker), asook die fliek Roepman (Erika Rademan).
  • Desiré vertolk nie net die titelrol nie, sy is ook die draaiboekskrywer van Magda Louw.
  • Sy het dit eers as eenpersoon-verhoogproduksie geskep voordat kykNET dit in 2021 as ’n storiefilm opgeraap het.
  • Vanjaar het die Magda Louw-verhoogstuk by die jaarlikse Suidoosterfees herleef.
  • Na afloop van die Suidoosterfees, het Desiré landwyd met die verhoogstuk getoer.
  • By vanjaar se Silwerskermfees, is Desiré is as die beste akteur in ’n komedie (vir die toekennings vir televisie), vir haar spel in die eerste seisoen van die reeks aangewys.

Die tweede seisoen van Magda Louw word van Maandag 1 Januarie 2024 om 20:00 op kykNET uitgesaai

Cindy Swanepoel binnekort in "Magda Louw" te sien

News
04 Desember 2023
Wanneer die tweede seisoen van kykNET se gewilde plaaslike komediereeks op 1 Januarie 2024 afskop, gaan kykers ’n paar nuwe gesigte ontmoet.
Magda Louw 1

Die grootste verandering is Cindy Swanepoel (Dr. Annelize Roux in Binnelanders) wat nou die rol van Gertrude Louw vertolk. Cintaine Schutte, wat in die eerste seisoen dié rol vertolk het, was weens ander verpligtinge nie beskikbaar vir die tweede seisoen nie. 

Saam met Cindy, is Magda Louw se hoofkarakters: Desiré Gardner as Magda, Hannes van Wyk as Erhard, Bennie Fourie as Baltus en Gershwin Mias as Shaun.

Ander bekende gasakteurs wat wéér hul verskyning in die reeks maak, is: Shimmy Isaacs as Lynette, Margit Meyer-Rödenbeck as Marlene, André Weideman as dr. Havenga, Mandri Sutherland as Delere en Mienke Ehlers as Lydia.

Daar is ook ’n handvol nuwe karakters wat kykers gaan ontmoet. Só kom Erhard se broer Ferdinand, wat deur Louw Venter vertolk word, ’n draai maak, terwyl Magda se paaie ook met ’n sosiale media-kenner Sol, gespeel deur Wian Taljaard, kruis. 

Ons het vyf vrae aan Cindy gestel.

1.  In jou eie woorde, hoe sal jy jou karakter Gertrude beskryf?

Gertrude is ’n vrou wat op haar eie voete staan. Sy vat nie nonsens nie. Sy is ’n realis wat miskien partykeer kan voorkom asof sy negatief is, maar sy is nie rêrig nie. Sy is net nie ’n vol-fiemies-mens nie.

Ek dink sy boor ook alles self in haar huis en sy kap ’n ding. Sy is selfstandig. Dit is vir haar belangrik dat ’n man nie dinge vir haar hoef te doen nie – sy kan dit self doen.

2.  Wat kan kykers van Gertrude in seisoen 2 verwag?

Gertrude gaan definitief swanger wees. Daar gaan dalk ’n verandering by haar plaasvind . . . so ’n  bietjie van ’n transformasie. Dit gaan nie massive wees nie, maar ek dink om ma te word verander wel iets in ’n mens.

3. Hoe was dit vir jou om komedie te doen? Wat is uitdagend/lekker daarvan?

Ek is baie lief vir komedie. Dit is my gunsteling genre en dit is ’n verskriklike uitdagende genre want jy moenie probeer om snaaks te wees nie, want dan is iets nie snaaks nie.

Ek dink dit gaan maar daaroor om vir Desiré [Gardner] te ondersteun. Magda is eintlik die kern-een, die snaakse een. Hoe meer jy jou karakter real speel en nie as ’n karikatuur speel nie, maak dit haar snaaks. 

Dis baie ensemble-werk. Dit gaan nie oor my nie, dit gaan daaroor om mekaar te ondersteun om die toneel snaaks te maak. 

Ja, ek love komedie. Gló net in die scene – dis so lekker geskryf dat dit baie maklik gebeur. 

4.  Hoekom dink jy is Magda Louw so gewild onder kykers?

Ek dink dis omdat dit so werklik is dat mense daarmee kan identifiseer. Dit is die klassieke Afrikaner-huishouding – die kos wat geëet word, die goed waaroor gepraat word, doilies . . . 

Daar is ’n karakter vir elkeen om mee te identifiseer, of dit is die huishouding self. Dis eerlik en eg. En dit is wat dit snaaks maak.

5. Enige iets anders oor jou ervaring op stel wat jy wil byvoeg?

Ek het verskriklik baie gelag. Desiré is ’n ongelooflike skrywer. Ek kon nie wag om die tekste te lees nie. Sy het rêrig net so ’n talent . . . ek admireer haar skryfwerk.

Sy is ongelooflik snaaks en ons het bitter baie gelag. En ons het soveel in gemeen. Ek was met ope arms verwelkom. 

Omdat Cintaine reeds die karakter gespeel het, was ek nogal senuweeagtig want ek het ’n ander energie. Niemand van ons is dieselfde nie, daarom maak dit nie saak wat ek gedoen het nie, want ek sou nie Gertrude presies soos sy dit kon doen nie. 

Almal het my vertrou en baie grasie gegee om die karakter self te kan inkleur op my manier, met karaktertrekke wat Cintaine reeds gevestig het. 

Dit was net ’n verskriklike lekker omgewing om in te werk. Ek kon nie glo ek gaan elke dag werk toe nie – ’n mens kan dit nie werk noem nie. Dit is tog wat ek nog altyd wou doen: ek wou net gaan speel by die werk. 

Die dae het so vinnig verbygegaan. Toe ek weer sien, toe’s dit verby. Ek hoop rêrig vir nog!

Die tweede seisoen van Magda Louw begin op Maandag 1 Januarie 2024 om 20:00 op kykNET (DStv-kanaal 144)