Die nuwe jaar bring ’n opwindende TV-lyn wat propvol avontuur, inspirasie en onvergeetlike stories is. Van adrenalienbelaaide hengeluitdagings in Hier gaan ons alweer tot hartroerende gesprekke in Hannes aan Huis, van die viering van lewe en wysheid in Met ’n huppel in die stap tot epiese kamp- en 4x4-avonture in Mal Kamper – al hierdie programme bied vir kykers iets besonders.

Elke program neem die gehoor na unieke plekke, wys buitengewone ervarings en deel die passie van mense wat hierdie stories lewe gee, en voorsien week ná week onvergeetlike oomblikke, lag en inspirasie.

Hier gaan ons alweer

Begin Maandag 5 Januarie 17:30

Hier gaan ons alweer keer terug met ’n vars seisoen wat propvol aksie en avontuur is. Die reeks neem kykers na unieke hengelwaters in Suid-Afrika en ons buurlande, waar ’n span tophengelaars op soek gaan na trofeegrootte karpe, babers, kurpers, swartbaars en selfs soutwatervisse langs die Afrika-kuslyn.

Hengellegendes Schalk van Breda en Petri de Wet skop die seisoen af in Noordwes by een van die land se top hengeloorde. Hulle trotseer wind en reën vanaf ’n aluminium boot terwyl hulle groot karpe en later ook mooi babers en swartbaars teiken – alles met ’n kombinasie van papgooi, kunsaas en deursettingsvermoë.

Verder besoek die span vir die eerste keer ’n uiters gewilde oord in Limpopo wat die afgelope jaar groot opslae gemaak het met rekordvangste. Hierdie nuwe seisoen bied asemrowende plekke, indrukwekkende visaksie en die heerlike kameraadskap wat kykers elke jaar terugbring.

Hannes aan Huis

Begin Dinsdag 6 Januarie 21:00

Hierdie seisoen van Hannes aan Huis bring ’n vars, uiteenlopende lys gaste. Die reeks skop af met die diep menslikheid van Lize Beekman, voordat Hannes in ’n openhartige gesprek met akteur David Reese delf in sy uitdagings, sy genesing en die nuwe perspektief wat daaruit gegroei het. Van daar af neem Hannes die pad Bloemfontein toe om die geliefde kinderboekskrywer Jaco Jacobs by sy tuiste te besoek.

Die nuwe seisoen bied ook kragtige stories uit die sport-, kultuur- en mediawêreld. Rugbylegende Kobus Wiese en voormalige Springbok James Dalton deel hul ervarings op en van die veld af, terwyl Martelize Brink – die stem van RSG – haar unieke lewens- en loopbaanreis vertel. Hannes kuier verder saam met Prof Michael le Cordeur oor onderwys en identiteit, en hy stap die kombuis binne saam met die ikoniese sjef Reuben Riffel.

Kultuur ikone soos Marlene le Roux, Antjie Krog, en die sprankelende opera-ster Zanne Stapelberg bring diepte, inspirasie en kreatiewe flair na die seisoen. Daarna reis Hannes na Caledon om met media-figuur Heindrich Wyngaard te gesels, voordat die reeks afsluit met ’n glansryke besoek aan Anita Lloyd van Real Housewives van die Wynlande. Die nuwe seisoen is propvol hart, humor, refleksie en onvergeetlike stories — die perfekte kuier vir ’n Dinsdagaand.

Met ’n huppel in die stap

Begin Woensdag 7 Januarie 17:30

Die nuwe seisoen van Met ’n huppel in die stap neem kykers weer op ’n opwindende reis deur die lewe ná 50. Elke episode fokus op mense wat hul passies volg, nuwe uitdagings aanpak en herinner dat ouderdom net ’n getal is.

Met humor, warmte en insiglike oomblikke deel die program stories van selfontdekking, vriendskap en die kuns om die alledaagse mooi te waardeer. Kykers word aangemoedig om die vreugde in klein oorwinnings te vier, nuwe drome na te jaag en met ’n ligte hart deur die lewe te stap. Hierdie seisoen wys dat die beste nog voorlê – vol avontuur, betekenis en onverwagse verrassings.

Mal Kamper

Begin Saterdag 10 Januarie 18:30

Die vyfde seisoen van Mal Kamper neem avontuur na ’n heel nuwe vlak. Dewald verruil gewone kampterreine vir die mees afgeleë, onherbergsame gebiede denkbaar, gewapen met sy volledig toegeruste Suzuki Jimny en sleepwa. Hierdie seisoen is die grootste nóg: 26 plaaslike kampeerplekke, 13 oorsese avonture, 13 unieke 4x4-roetes en in totaal meer as 50 splinternuwe bestemmings. Of dit nou die Tankwa, Sederberge, Weskus, Namakwaland, Karoo, Suid-Kaap of Overberg is — elke plek bring sy eie uitdagings, natuurpracht en onvergeetlike oomblikke.

In Mal Kamper word daar met alles gekamp wat wiele het: die 3-deur én 5-deur Jimny, ’n boot, ’n vetfiets, ’n quadbike en selfs ’n elektriese scooter. Die 13 eendag-4x4-roetes wys hoe die Jimny elke hindernis baasraak voordat die perfekte kampplek vir die nag gevind word. Die adrenalien hou egter nie daar op nie — Dewald toer deur die Kafue Nasionale Park in Zambië, waar hy kamp tussen wilde diere, met die boot tussen seekoeie en krokodille vaar, die park uit die lug verken, en selfs ’n nag sonder tente deurbring onder Afrika se sterrehemel.

Internasionaal wag nóg avontuur. In Turkye verken hy die historiese stede Antalya, Perge en Side, vaar die Koprulu-rivier met ’n raft, en sien die magiese landskappe van Cappadocia vanuit ’n microlight én ’n warm lugballon. Met vuur op die kole, opwinding in die lug en avontuur in elke draaipad, bewys Mal Kamper se nuwe seisoen dat die beste stories ontstaan wanneer jy die wildste paaie kies.