Logo

Modder en Bloed: Amptelike lokprent

Nuus
08 Februarie 2016
Die amptelike lokprent van Modder en Bloed (Blood and Glory), is onlangs bekendgestel. Kyk dit hier.
Modder Bloed Lokprent B
Die amptelike lokprent van Modder en Bloed (Blood and Glory), die nuwe fliek deur Dark Matter Studios (Leading Lady) en Collective Dream Films (Platteland’n Man Soos My Pa) is onlangs bekendgestel.

Dié fliek, wat ’n groep Anglo-Boereoorlog-krygsgevangenes op St. Helena-eiland se ontberings, uithouvermoë en die dapper aanvaarding van ’n uitdaging uitbeeld, spog met een van die grootste rolverdelings nóg in ’n Suid-Afrikaanse fliek.

Kyk die lokprent hier:



Plaaslike akteurs soos Stian Bam, Altus Theart, Edwin van der Walt, Grant Swanby, Bok van Blerk, Deon Lotz, David Louw, Albert Maritz, Michael Richard, Jacques Bessenger, Albert Pretorius is van die akteurs wat in hierdie epiese fliek te sien is.

Britse sterre in die rolverdeling sluit in Charlotte Salt (Beowulf/The Tudors), Patrick Connolly (Inferno/Crushed), Nick Cornwall (Blood Loyal/Retribution) en Josh Myers (The Sweeney/Anti-Social).

Willem Morkel (Stian Bam), ’n Boerekryger en familieman se vrou en enigste kind word tydens die Anglo-Boereoorlog (1899-1902) deur Britse soldate vermoor, waarna hy saam met ander Boere-krygsgevangenes op St. Helena-eiland in die Atlantiese Oseaan aangehou word.

Hier word die Engelse konsentrasiekamp beheer deur Kolonel Swannell (Grant Swanby), ’n vurige imperialis met ’n onblusbare haat teenoor die Afrikaner.

Met die bystand van sy mede-gevangenes aanvaar Willem ’n uitdaging wat uiteindelik sal lei tot soete wraak in die belangrikste rugbywedstryd van hul lewens.

34 modder bloed lokprent


Stian Bam gesels oor sy rol en ondervindings op stel: “Willem is ’n groot rol; ikonies in aard. So is Modder en Bloed ook epies in skaal en omvang. Min kry jy die geleentheid om so ’n rol te kan speel en om deel te wees van so ’n fliek.

“Die grootste hoogtepunt was die verskillende departemente wat werk van die hoogste kwaliteit gelewer het. Vir elkeen het ek ook die grootste respek. Dan moet ek ook noem dat dit ’n groot voorreg was om saam met die internasionale akteurs te werk.

“Charlotte Salt (Katherine Sterndale) is een van die vrygewigste en onselfsugtigste aktrises. Aanvanklik was ek baie op my senuwees om teenoor haar te speel, maar sy is so gemaklik dat een van my gunstelingtonele van die fliek saam met haar is.

“En dan Patrick Connolly (Finn Kelly). Ek sou nie Willem sonder Patrick kon skep en deurvoer nie. Hy was my vangnet.”

Modder en Bloed is geskryf deur Sean Else en hy is ook die regisseur. Die fliek is vervaardig deur Llewelynn Greeff, Henk Pretorius en Sean Else.

Modder en Bloed word op 1 April 2016 plaaslik vrygestel en word deur Ster-Kinekor Entertainment versprei. Lees meer oor die fliek hier.