Logo

Insig: Xenofobie

Nuus
21 April 2015
Emmanuel Sithole, ’n Mosambiekse man, is ten aanskoue van die Sunday Times-fotograaf James Oatway en -joernalis Beauregard Tromp met ’n mes doodgesteek.
WaldimarInsig

’n Bloedige toneel van xenofobiese geweld het Saterdag in Alexandra naby Sandton in Johannesburg afgespeel. Emmanuel Sithole, ’n Mosambiekse man, is ten aanskoue van die Sunday Times-fotograaf James Oatway en -joernalis Beauregard Tromp met ’n mes doodgesteek.

Oatway en Tromp was Maandagaand in die ateljee om oor dié aanval te gesels. Een van Oatway se foto’s, wat Sondag die voorblad van die Sunday Times gehaal het, is volgens die radiostasie PowerFM deur pres. Jacob Zuma as “onsensitief” gebrandmerk. Oatway het gesê dit maak nie saak of ’n mens dit ’n xenofobiese aanval noem of nie; dit bly ’n brutale moord. Volgens hom en Tromp het hulle nie Saterdag baie spanning in Alexandra gevoel nie. “Kinders het in die strate gespeel,” het Oatway gesê. Hy het gesê ’n mens kan nie sê die onlangse xenofobiese aanvalle is meer gewelddadig as dié in 2008 nie, maar dat winkels meer as mense geteiken word.

David Cote van Lawyer for Human Rights het aan aanbieder Waldimar Pelser vertel daar was nog altyd geweld teenoor buitelanders in Suid-Afrika – selfs ná 2008.

In ’n video-rubriek het die vryskutjoernalis en -skrywer Martie Retief-Meiring gesê Suid-Afrika het ’n ongekende invloei van buitelanders. “Hoekom het ons so lank gewag? Die Zhoeloe-koning speel ’n rol – hoe jy ookal daarna wil kyk,” het sy gesê. “’n Stamkultuur het nou ontwikkel, en dit is wat so skrikwekkend is.”

Ook in die ateljee was Zwelinzima Vavi, die geskorsde hoofsekretaris van Cosatu, om oor arbeidspolitiek te gesels, en prof. Morné Olivier van die Universiteit van Witwatersrand het sy mening oor transformasie in die Regterlike Dienskommissie kom deel.