Die program volg ’n groep ervare avontuurmotorfietsryers wat van Suid-Afrika se mooiste grondpaaie, berge en kusstreke verken – van die Oos-Vrystaat en Noordoos-Kaap se bergpasse tot die Karoo, Tuinroete en Wes-Kaap se suidelike agterpaaie, met die epiese tog wat eindig by Kaap Agulhas, die mees suidelike punt van Afrika.

Die reeks word aangebied deur drie bekende en ervare motorfietsryers, elk met hul eie unieke styl en persoonlikheid:

·       André de Villiers, ’n bekende gesig op kykNET sedert 2004 en 4x4-spesialis.

·       Hans Strydom, ’n ywerige veldmotorfietsryer sedert 1975 met meer as 122 000 volgelinge op sosiale media.

·       Franswa Smit, stigter van My Bike Adventures & Toere en Motorfietskampering Suid-Afrika, en passievol oor avontuurmotorfietsritte en toerisme.

Hierdie ervare aanbieders bring hul kundigheid, passie en pioniersgees na elke roete.

Daar is ’n besonderse bekoring in die vryheid wat ’n mens ervaar wanneer jy op ’n grondpad met ’n motorfiets die oop pad aandurf – die gebrul van die enjin onder jou en die ongerepte natuurskoon wat jou omring. 1-Spoor-avonture vang daardie gevoel vas en maak kykers deel van die onvergeetlike ervarings langs die pad.

Die motorfietse

• Hans Strydom ry op sy betroubare Honda Africa Twin, beter bekend as die “Rooikat”.
• Franswa Smit se Suzuki V-Strom, “Samurai”, neem hom op uitdagende roetes.
• André de Villiers bestuur die BMW 1250 GS Adventure van Fly to Ride, bekend as die “2x1”, en bring sy uitgebreide 4x4-ervaring saam.

Wat maak elke episode besonders?

Elke episode fokus op die unieke ervaring van avontuurmotorfietsry en kombineer die volgende elemente:

• Verkenning – bestemmings wat slegs per motorfiets bereik kan word.
• Praktiese wenke – insigte oor hoe om te ry, wat om te pak, en moets en moenies vir elke toer.
• Kameraadskap – die band tussen die ryers en die verhale wat hulle deel.
• Plaaslike gidse – nuwe gesigte wat hul geheime roetes en dorpe wys.
• Kampvuurgeselsies – ontmoetings met mense langs die pad en die stories wat hulle vertel.

1 Spoor avonture wil kykers inspireer om self avontuurmotorfietstoerisme te ontdek hier in Suid-Afrika. Die reeks wys nie net die ongelooflike skoonheid van ons land se grondpaaie, bergpasse en mense nie, maar beklemtoon ook die vryheid, kameraadskap en die sensasie van ontdekking wat elke ryer beleef. Elke episode is ’n uitnodiging aan kykers om die pad aan te durf, nuwe ervarings te soek en hul eie avonture te beleef.

1 Spoor avonture begin Maandag 6 Oktober om 17:30 op kykNET (DStv-kanaal 144). Dit sal ook op DStv Stream beskikbaar wees.