Wie kan ’n tweede porsie weerstaan? Met brosgebraaide aartappelskyfies is dít een van my gunstelingbederwe.
Wat jy benodig:
- hout of kole vir braai
- 4 T-been-steaks
- 60 ml olyfolie
- sap en gerasperde skil van 2 suurlemoene
- sout en varsgemaalde swartpeper
Sous
- 30 ml olyfolie
- 1 ui, fyngekap
- 2 knoffelhuisies, fyngekap
- 5 ml heel komyn
- 200 g spekblokkies
- 250 g sampioene, in skywe gesny
- 500 ml room
- sout en varsgemaalde swartpeper
Hoe jy dit doen:
Maak die sous eerste: Verhit middelslagpot oor hoë hitte tot warm en plaas olyfolie, uie, knoffel, komyn en spek in pot. Roerbraai 2-3 minute of tot spek bros is. Voeg sampioene by en braai 3-5 minute of tot sampioene gaar is. Voeg room by en geur goed met sout en peper. Laat sous oor lae hitte prut tot room met 1/3 weggekook het. Hou eenkant.
Kry jou vuur reg vir rooiwarm kole. Plaas steak in ’n vleisbak en sprinkel olyfolie, sout en peper, suurlemoensap en -skil oor vleis. Meng om seker te maak dis oraloor bedek. Plaas steaks met vet rugkante na onder op ’n rooster wat sowat 15 cm bo kole rus. Laat die vet eers uitbraai. Draai steaks dan plat op rooster en braai sowat 5-6 minute aan ’n kant vir medium, of langer soos jy verkies. Plaas steaks terug in vleisbak en laat 5 minute eenkant rus. Sit voor met sampioensous en bykos van jou keuse.
Kyk die video hier bo om te sien presies hoe Herman dit doen!
