Teresa Wessels
OUDERDOM: 49
AREA: Randburg, Johannesburg
BEROEP: Persoonlike Assistent by ’n groot bankgroep
HOEKOM DINK JY IS JY ’N GOEIE KANDIDAAT VIR KYKNET SE PROGRAM ‘KUNSVLYT’?
Ek het ’n wye kennis van kunsvlyt en ek kan ’n groot verskeidenheid kunsvlyt doen. Ek kan met baie verskillende teksture en kunsmediums werk. Ek hou van ’n uitdaging en kan redelik goed onder druk werk.
WAT SE TIPE KUNSVLYT DOEN JY, EN WAT GENIET JY DIE MEESTE?
Ek doen kalligrafie, mosaïek-werk, teken mandalas, hekel, doen kralewerk, verf, naaldwerk, doen kunsjoernaal, maak trou uitnodigings en ‘upcycle’. Ek geniet kalligrafie die meeste aangesien jy dit met baie van die bogenoemde kunsvlyt kan kombineer.
HOE GEREELD DOEN JY KUNSVLYT?
Daagliks (wanneer ek kan). Anders elke tweede dag.
WATTER ANDER STOKPERDJIES BEOEFEN JY OOK?
Ek hou van stap, lees en tuinmaak.
WAS JY AL TEVORE OP TELEVISIE?
Nee.
WAT IS JOU GROOTSTE PASSIE?
Om eendag my kunsvlyt voltyds te beoefen en ’n inkomste te maak daaruit. Klasse aan te bied, my eie studio te besit of my eie kunswinkel te besit.
VERTEL ONS VAN JOU GESINSLEWE?
Ek en Johan is amper 27 jaar getroud met twee pragtige dogters, Joanè en Taryn. Joanè is 'n gekwalifiseerde grafieseontwerper en trek eersdaags Lima, Peru, toe. Taryn het Gasvryheidsdienste geswot en werk tans by ’n groot hotelgroep in Amerika. Ons is oorspronklik van Pretoria, maar na 15 jaar se heen-en-weer ry het ons Randburg toe getrek.
Ek werk vir ’n groot bankgroep as ’n Persoonlike Assistent vir een van die Tegnologie Hoofde gewerk. ’n Baie stresvolle en besige pos. Ek is al meer as 30 jaar ’n Persoonlike Assistant en geniet my werk.
My man werk by ’n maatskappy wat spesialiseer in suiwering van water en allerhande stowwe. Ek het in Rustenburg groot geword en hy in Pretoria.
Ek dink my kunsvlyt is vir my ’n tipe uitlating vir my stresvlakke. Dit hou my aan die gang. My man sê altyd vir mense ek het meer ‘hobbies’ as wat ’n maer hond hare het. Ek sal nie myself daarop roem dat ek goed is met alles wat ek doen nie,maar ek geniet alles wat ek doen! Ek het deur my lewe baie van kunsvlyt geleer deur my ouma, my ma en ander vriendinne.