Die GROOT Ontbyt

’n Passie vir Afrikaans, radio, musiek, mense én die lewe!

Elsa is in 1991 gebore met ’n liefde vir gesels. Sy het nog altyd geweet wat sy eendag wil bereik. Dis tydens ’n deurnag-kuiersessie in ’n radio-ateljee wat sy haar hart op dié medium verloor het en dadelik besef het dís waar God haar wil hê.

Sy het Kommunikasiekunde studeer. In 2012, op 21-jarige ouderdom, het sy haar doelwit bereik, en haar debuut op Bosveld Stereo in Hartbeespoort gemaak. In 2013 het haar GROOT avontuur by GROOTfm 90.5 afgeskop. Kort daarna het die nuus-gogga haar gebyt en het sy in 2014 soggens ’n draai op e.tv se Sunrise gemaak.

“Mense som my dikwels op as ernstig, maar ek lag eintlik báie en maklik, jy weet?” sê Elsa. “Dit bly ’n voorreg om steeds by my mentor LiMari Louw en ander rolmodelle in die bedryf soos Mariëtta Kruger te kan leer – dit hou my op my knieë, en my GROOTSTE droom GROOT. Ek praat baie en is versot op my twee kat-kinders Luca en Lika en spanjoel-kind Cleo.”