Van die stowwerige paaie van die Karoo tot die neon-ligte van Japan, en van die opwinding van die motorbaan tot die stilte van ’n teetafel – kykNET (DStv-kanaal 144) nooi kykers op ’n onvergeetlike reis.
April se nuwe reekse en nuwe seisoene van gunsteling reekse kombineer die vindingrykheid van die jeug met die wysheid van seniors, en bied ’n venster op die wêreld wat sowel plaaslik as internasionaal inspireer. Dit skep ook ’n unieke balans tussen die vinnige pas van moderne tegnologie en die kosbare oomblikke van menslike konneksie.
Ideemakers
Begin Vrydag 3 April 17:30
Die nuwe kykNET-reeks Ideemakers skyn die kollig op die vindingrykheid van jong tieners wat deur die Tritech-wetenskapkompetisie in Limpopo oplossings vir alledaagse kwessies soek. Oor agt episodes volg ons hierdie entoesiastiese deelnemers terwyl hulle praktiese vrae ondersoek, soos hoe om hitte-energie in elektrisiteit om te skakel of watter lekkers die beste vir tande is. Die reeks, vervaardig deur die SAFTA-bekroonde Storytown Productions, fokus daarop om wetenskap toeganklik en menslik aan te bied deur die kinders se passie en toewyding eerste te stel.
Benewens die jong uitvinders se stories, betrek die reeks ook kenners van die Universiteit van die Vrystaat wat insig gee in die nuutste verwikkelinge binne verskeie wetenskapsvelde. Die seisoen bou op na ’n opwindende klimaks waar die deelnemers hul finale projekte aan beoordelaars bekendstel en die wenners van die 2025-kompetisie gekroon word. Vir die span agter die skerms is dit duidelik dat hierdie projekte nie net oor ingewikkelde teorieë gaan nie, maar oor hoe jongmense met deernis en kreatiwiteit ’n werklike verskil in hul onmiddellike omgewing kan maak.
.jpg?r=0,3,2416,1360&w=1600&h=900)
Leef jou reis
Begin Saterdag 4 April 19:30
Die nuwe seisoen neem die Leef jou reis-span op ’n merkwaardige reis vanaf die ryk geskiedenis van Roemenië en Transilvanië, waar die geheime van Boekarest se marmerpaleise en die legendes van Dracula ontrafel word, tot by die neon-verligte strate van Japan. In die Ooste verken die span eeue oue Shinto-tempels, die kuns van sushi en die diep simboliek van Japannese tuine, terwyl die rustigheid van Kyoto se bamboeswoude en tradisionele teeseremonies ’n fassinerende kontras bied met die vinnige sneltreine en besige kosmarkte van Osaka.
Die avontuur gaan voort in Londen met besoeke aan geskiedkundige kroegies en koninklike kastele, gevolg deur ’n yskoue tog na die verre noorde van Noorweë om die Noorderligte en die antieke kultuur van die Sami-mense te aanskou. Terug op eie bodem kuier die span in die hartjie van die Karoo op die plaas Theefontein. Hier word die krag van veldkruie en die bewaring van die skaars oewerkonyn gevier, wat die seisoen afsluit met ’n intieme kykie na die natuurlike skoonheid en deernisvolle stories van Suid-Afrika.
Fiësta
Begin Sondag 5 April 18:00
Fiësta vier reeds meer as twee dekades van feesvieringe en is nou terug op die lug om kykers weer weekliks na Suid-Afrika se mees diverse feeste te neem. Die nuwe seisoen skop op 'n hoë noot af met 'n besoek aan die Town 10s in Groenpunt, waar aanbieder Wicus Pretorius self sy slag op die sportveld wys. Terselfdertyd verken Rumacques Gelderbloem die kulturele rykdom van die Ramadaanfees in Kaapstad, 'n inklusiewe geleentheid wat dien as voorbereiding vir die heilige maand.
Buiten hierdie eerste paar besoeke, is daar nog baie meer waarna kykers kan uitsien soos die seisoen ontvou. Die program beloof om voort te gaan met sy tradisie om sowel groot, bekende feeste as unieke, kleiner juwele te besoek. Met 'n mengsel van ou gunstelinge en splinternuwe ontdekkings op die horison, bly Fiësta die ultieme wegwyser na die land se beste vermaak en kultuur.
.jpg?w=1600&h=900)
Met ‘n huppel in die stap
Begin Woensdag 8 April 17:30
Die lewe na 50 hoef glad nie vervelig te wees nie; dit kan trouens die opwindendste tyd van ’n mens se lewe wees. In hierdie reeks wys ons hoe seniors nuwe betekenis aan hul lewens kan gee deur verskeie moontlikhede en leefstyle te verken. Die span besoek onder meer verskillende gholflandgoedere om vas te stel watter aftree-opsies daar beskikbaar is, terwyl daar ook gekyk word na onlangse seniors-musiekkompetisies wat onder leiding van Cor Uys by ATKV-Buffelspoort aangebied is.
Verder fokus Met ‘n huppel in die stap op die praktiese aspekte van ouer word deur kennis te maak met verskaffers van hulpmiddels wat onafhanklikheid kan ondersteun. Daar word ook indringend gekyk na die rol van nuwe tegnologie, waar kundiges verduidelik presies wat Kunskmatige Intelligensie is en hoe dit ’n positiewe impak op die lewens van seniors kan hê. Dit is ’n omvattende kykie na hoe moderne seniors vandag se uitdagings en geleenthede kan aanpak.
La’t Wiel
Begin Dinsdag 14 April 17:30
La’t Wiel is terug vir ’n nuwe seisoen te midde van ’n besige motorjaar gevul met opwindende bekendstellings. Die span bekyk die opgekikkerde Toyota GR Yaris om te sien of sy hoër prys die verbeterde verrigting regverdig, terwyl die voortgesette instroming van voertuie uit die Ooste ook verken word. Van nuwelinge soos die Omoda C7 tot die buitengewone Changan Deepal, die mark verskuif duidelik sy fokus na innoverende Chinese handelsmerke.
Hierdie seisoen takel die span ook die unieke Changan Hunter REEV, ’n elektriese bakkie wat ’n petrolenjin as kragopwekker gebruik, en vergelyk ou staatmakers soos die VW Golf 8.5 en Honda CR-V met moderne uitdaers. Elektriese luuksheid kry ook aandag met die Lexus RZ en die stylvolle Alfa Romeo Junior Veloce. Of dit nou gaan oor gevestigde erfenis of splinternuwe tegnologie, die span dek die hele spektrum van die huidige Suid-Afrikaanse motormark.
KoppieTeefontein
Begin Woensdag 15 April 21:00
Die gewilde kykNET-geselsprogram KoppieTeefontein is terug vir ’n splinternuwe seisoen, en soos altyd beloof aanbieder Jak de Priester om kykers diep in die harte van Suid-Afrika se mees geliefde persoonlikhede in te neem. Die nuwe reeks skop af op Woensdag 15 April om 20:00, waar die ritueel van tee drink weer die weg baan vir sielvolle, ongejaagde gesprekke. In ’n wêreld wat dikwels te vinnig beweeg, bied hierdie program ’n noodsaaklike oomblik van stilstaan, waarin Jak sy gaste met deernis en opregte nuuskierigheid pols oor hul lewenspad, suksesse en die stories wat hulle gevorm het.
Hierdie seisoen spog met ’n gastelys wat oor die spektrum van kuns, vermaak en media strek. Kykers kan uitsien na kuiers met die legendariese Nederlands-Afrikaanse sanger Stef Bos, die veelsydige vermaaklikheidster Pedro Kruger, en die baskitaarspeler Schalk Joubert. Die sprankelende radio- en TV-persoonlikheid Success Lekabe bring haar eiesoortige energie na die tafel, terwyl die mediabaas en veteraan-uitgewer Ton Vosloo seldsame insigte in sy merkwaardige loopbaan deel.
Of jy nou op soek is na praktiese raad, kulturele verryking of bloot ’n oomblik van sielsrus, April op kykNET is propvol stories wat die hart raak en die verbeelding aangryp.