Die eerste aflewering word Sondag 18 Januarie om 20:00 op kykNET (DStv-kanaal 144) uitgesaai, en op Dinsdag 20 Januarie is daar ’n dubbeldoorlagdosis wanneer die eerste twee episodes op Showmax première. Daarna sal een nuwe episode per week op albei platforms beskikbaar wees.

Die lokprent gee Suid-Afrikaners hul eerste voorsmakie van die 2025 Fleur du Cap- en Woordtrofee-wenner Albert Pretorius (Niggies; Nêrens, Noord-Kaap) as Flip, die bestuurder van die polonieverspreiders Deluxe Processed Meats.

Ons het met Albert gesels om meer uit te vind oor sy grootste TV-rol nog:

Die kantoorbestuurder is ’n ikoniese rol wat vir beide Ricky Gervais en Steve Carell hul eerste Golden Globes besorg het, onderskeidelik as David Brent in die Britse weergawe en Michael Scott in die Amerikaanse weergawe. Het jy onder druk gevoel oor die groot skoene wat jy moet volstaan?

Ja, dit is ’n angswekkende enetjie, want dis een van dié droomrolle. Bitter min mense kry ooit die kans om so ’n groot rol te speel.

Vertel ons van Flip.

Flip sien homself as die Rassie Erasmus van polonie. In sy kop maak die dokumentêre span sy Chasing the Sun, oor hoe hy hierdie span na die volgende vlak van sukses neem.

Hy het grootgeword met Leon Schuster. So, hy is lief vir poetse en candid camera-grappies en probeer dit ook in die dokumentêr inbring.

Hy worstel met wat dit beteken om ’n man te wees – ’n Afrikaanse man – maar hy besef nie dat baie van die eienskappe waarna hy streef argaïes is nie. Of dat hy eintlik baie min van hierdie eienskappe enigsins het nie. Dis waar die komedie lê, want hy probeer so bleddie hard net om aanvaar te word.

Is dit nie wat cringe-komedie is nie? Mense wat hul bes probeer deur absoluut die ergste weergawes van hulself te wees.

Wat was jou eerste indruk toe jy die draaiboek lees?

Ek is eers net een monoloog gestuur, sonder konteks, en my onmiddellike reaksie was: “Ons kan niks hiervan op TV sê nie.”

Wat het jou toe laat instem tot die rol?

Toe ek die volledige draaiboeke lees, het ek besef daar is baie onnoselheid, maar daar is ook baie hart en dinge waarmee mense hulle sal kan vereenselwig.

Daar is wel onvanpaste goed, en op die eerste dag het Bennie vir die rolverdeling en span gesê: “Luister, Flip het geen filter nie, maar Albert is die gaafste ou. Wat ook al oor sy lippe rol oor die volgende sewe weke – moenie aanstoot neem nie.”

Maar wanneer Flip iets ergs sê, is daar gewoonlik ’n kyk na die kamera, of hy betrap homself, of een van die ander karakters is duidelik geskok. Daar is dus ook kommentaar op die onvanpastheid.

Was jy ’n aanhanger van The Office voordat julle begin verfilm het?

Ek het die Britse weergawe as dramastudent aan die Universiteit van Kaapstad gekyk en vir die eerste 15 minute nie besef dit is nie regtig ’n dokumentêr nie. Daarna was ek soos: “Julle ouens! Wow! Oukei, oukei, dis geniaal.”

Ek was so mal daaroor dat ek aanvanklik geweier het om die Amerikaanse weergawe te kyk. Maar daardie een het my toe deur Covid gedra. Die twee weergawes is baie verskillend, maar albei briljant.

Watter een het jy verkies?

Ek kan nie sê nie. Ek hou van die cringe-faktor van die Britse een en die hart van die Amerikaanse een. Ek is mal oor Ricky Gervais: Hy is die oorspronklike baas, en dit is sy breinkind. Maar daar is ook iets aan Steve Carell, en ek dink sy verhouding met Holly is een van die mooiste romanses in die geskiedenis van TV.



Aan watter een is Die kantoor die naaste?

Ons het ons eie sin vir humor. So, ons s’n is anders as beide. Dit is nie heeltemal die Britse cringe of so oordrewe soos die Amerikaanse humor nie. Dis weer iets anders.

Jy het saam met ’n sterk ensemble van akteurs gewerk. Moes hulle regtig by hul lessenaars bly soos agtergrond-ekstras selfs wanneer hulle nie in ’n toneel was nie?

Ja. Die kameras kon hulle enige oomblik vang. So, hulle moes in karakter bly. Dit het ongelooflik baie bygedra daartoe om dit soos ’n regte kantoor te laat voel.

Hulle het baie tyd gehad. Ilse [Oppelt] het haarself leer teken, en op die laaste skietdag het sy vir elke akteur en spanlid ’n tekening gegee wat sy gemaak het.

Ek is seker daar was tye wat hulle gevoel het: “Vandag is ek net in die agtergrond.” Maar wanneer jy die eerste episode kyk, sien jy hoe gereeld ander spelers gewys word en besef jy Flip doen baie van die praatwerk, maar dit is 100% ’n ensemble. Dit is Joanne wat ’n kyk gee; Gavin wat ’n foto neem van ’n uitbarsting; Joubert wat ’n wenkbrou lig – dis wat die reeks regtig laat werk.

Buiten Die kantoor, wat hou 2026 vir jou in?

Ek het pas saam met my verloofde in ’n nuwe huis ingetrek, ek word 40, en ek trou. So, op die oomblik is my groot fokus my gastelys. Ek is ook besig om ’n kortfilm te skiet en voor te berei vir nog opvoerings van die toneelstuk Ek is nie Danie.

Terwyl jy wag vir die Suid-Afrikaanse een in Januarie, kyk gerus op Showmax na die Amerikaanse weergawe van The Office S1–9 en sy susterreeks The Paper.